‪‎పాండురంగాష్టకం‬

‎పాండురంగాష్టకం‬..

మహాయోగపీఠే తటే భీమరథ్యా – వరం పుండరీకాయ దాతుం మునీంద్రైః!
సమాగత్య తిష్ఠంతమానందకందం – పరబ్రహ్మలింగం భజే పాండురంగమ్!!1!!
తటిద్వాససం నీలమేఘావభాసం – రమామందిరం సుందరం చిత్ప్రకాశమ్!
వరం త్విష్టకాయాం సమన్యస్తపాదం – పరబ్రహ్మలింగం భజే పాండురంగమ్!!2!!
ప్రమాణం భవాబ్ధేరిదం మామకానాం – నితంబః కరాభ్యాం ధృతో యేన తస్మాత్!
విధాతుర్వసత్యై ధృతో నాభికోశః – పరబ్రహ్మలింగం భజే పాండురంగమ్!!3!!
స్ఫురత్కౌస్తుభాలంకృతం కంఠదేశే – శ్రియా జుష్టకేయూరకం శ్రీనివాసమ్!
శివం శాంతమీడ్యం వరం లోకపాలం – పరబ్రహ్మలింగం భజే పాండురంగమ్!!4!!
శరచ్చంద్రబింబాననం చారుహాసం – లసత్కుండలాక్రాంతగండస్థలాంతమ్!
జపారాగబింబాధరం కంజనేత్రం – పరబ్రహ్మలింగం భజే పాండురంగమ్!!5!!
కిరీటోజ్జ్వలత్సర్వదిక్ప్రాంతభాగం – సురైరర్చితం దివ్యరత్నైరనర్ఘైః!
త్రిభంగాకృతిం బర్హమాల్యావతంసం – పరబ్రహ్మలింగం భజే పాండురంగమ్!!6!!
విభుం వేణునాదం చరంతం దురంతం – స్వయం లీలయా గోపవేషం దధానమ్!
గవాం బృందకానందదం చారుహాసం – పరబ్రహ్మలింగం భజే పాండురంగమ్!!7!!
అజం రుక్మిణీ ప్రాణసంజీవనం తం – పరం ధామ కైవల్యమేకం తురీయమ్!
ప్రసన్నం ప్రపన్నార్తిహం దేవదేవం – పరబ్రహ్మలింగం భజే పాండురంగమ్!!8!!
స్తవం పాండురంగస్య వై పుణ్యదం యే – పఠంత్యేకచిత్తేన భక్త్యా చ నిత్యమ్!
భవాంభోనిధిం తే వితీర్త్వాంతకాలే – హరేరాలయం శాశ్వతం ప్రాప్నువంతి!!9!!